وانْـتَ مَـاشِــي

وانْتَ ماشِي .. 

بُصّ خُد مَصْرك معَـاك ..

خُـد معاك العنْـدليـب ..

ذِكـريات أوّل حبيـب ..

قصّـتَــك ..

كسْفِـتَـك يُـوم ما اشتريت أوّل هِـديّـة ..

ديّـــه أحْـلـــى؟؟ .. ولّا ديّــه؟؟

وانتَ بتْـحاول تظبّـط فِـ البُـوكيـه ..

وانتَ مش عارف تقُـول فِـ الكـارت إيه ..

وانتَ بتـعـدّ الثـواني عشـان تشـوفـهــا ..

وامّا دارِت وشّهَـــا كِــده من كسُـــوفها ..

وانتَ مِحْتــار تِلْـبـس ايـــه ..

وتـرُوحُـوا فيــن ..

وتقُــولُـوا إيــــه ..

*  *  *

وانتَ ماشــي ..

بُصّ خُـد مَصرَك معاك ..

خُـد معاك السّــت .. خُـد عبـدالـوهـاب .. 

الخـروجَــة والقهــاوي والصّـحـاب ..

والهَــوا على كُوبري قصر النّيـل فـ تسعة ..

بعد نُـصّ الليــل ونِسْمَــة فيهــا لَسعَـــة ..

"في كبـابْجـي لسّـه فاتـح فِـ المُقَـطّــم ..

فُـرصة برضُه نـروح نســقّم ..

عَـ اللى راكنِــين عَـ الجّنـــاب ..

يالّلا نِـطلِــع لسّــه بَــدري ..

هُـمّ كـام سـاعة حـ نِتْعـشي وخـلاص ..

وامّا نِنْـزل نِبْـقى نِفطَــر أيّ حاجـة والسّـلام ..

فـي بشـندي فـي المَــوارْدي ..

ولّا اقولــلك .. 

فكـرة برضُـه نـرُوح طُــولون  ..

صَحن زِبــدة وصَحن حــار ..

يبقَـى ظبّطــنا الفِطـــار" ..

*  *  *

وانتَ ماشــي ..

بُـصّ خُـد مصْـرك معَــاك ..

خُـد معاك المُقـرئـين والنّقـشَـبَـنـدِي ..

اسمَـاعيــل والبـَـاز افَنـــدِي ..

الكّـركَـديــه والتّـمرهِنــدي ..

خُـد معَـاك رمَضَان وقُــرآن الفِطار ..

خُـد معَـاك الشّـاي بتـاع بَعـدِ الفِطـار ..

وافْـتِكِـــر ..

وانتَ مستَـعجِـل عشـان تنْــزِل تصلّـي ..

وانتَ مِتــأخّـر تَمَـلّـــي ..

"ياللا يابنـي عشـان خـلاص وقـت العِشَــا ..

خَدت ميّـة؟؟ .. خدت سجّــادة؟؟

كلّـمْت جِـــدّو؟؟

جِــدّو حَـ يصلّي العِشـــا؟؟؟

ياللا يابنِـــي ..

الجـوّ حـرّ مُخِيـف سَخِيــف ..

عـاوزين مَكَـان جنْـب التّـكـيـف "..

*  *  *

وانتَ ماشِـي .. 

وانتَ قاعِـد فِـ المَطــار ..

إيـهِ الحِكــاية؟ الوَقـت طـار ..

إنت خَـايـف عَـ الــوَرَق ..

وحَـد جنـبَك شكْلُــه ميّــت مِـ القَلَـق ..

وحَـد سانِــد عَـ الإِزاز ..

الفـاتْحَــة للنّـاس العُــزاز ..

والصّـبر للنّـاس اللي سايْبـينهُم هِـنـا ..

نُصّ الكّـلام بَقَـى "نِفْـسِنـا" و"كَان نِفْـسِنـا" ..

َنِرجَـع نِقُــول نفــس الكّــــلام ..

"كَـــام شَهْـــر ويعــدّوا أَوام" ..

*  *  *

وانتَ قَـاعِــد فِـ المَطَــار ..

وانتَ سَـارِح غَصْـب عنّـــك ..

وانتَ سايِــب حِـتّــة مِـنّــــك ..

إنتَ بِتْقَــارِن ما بين غَـالي ورخِيـص ..

حَـدّ نِفسُـــه يمُــصّ دمّـــــك ..

وحَـدّ سايبْ دَمْعَـتُة فـ كِتـف القَمِيــص ..

هشام حسني

أغسطس - ٢٠٢٠

معـلــشّ

- الو .. أهلا .. صباح الخير ..

   معاك "معلـش" ع التليفـون ..
= أفـندم قلتِ اسمِـك إيه؟؟

-  أنا الـ "معلـش" ..
   لو تسمح .. أوضح لك؟ ..

   ولو ممكن أعـدي عليك ..
   وأشرحلك؟ ..

   نقـول مثـلاً ..
   إذا حسَيت بأنك مرّة مش فِ المـود ..
   خـلاص معلـش ..
   ولو حسيت بإنك حتى مش عـايش ..
    ومش موجـود ..
   كمان معـلش ..
   ولو حبّيـت ومش طايـل ..
   ولو مهموم ومش قايــل ..
   ولو تعبــان ..
   ولو مظلـوم ..
   أقول لك؟؟
   هاجيبلك قـدّ كام معلـش ..
   فخلّيهم معـاك .. معلـش ..
   ح تحتاجهم كتيـر قُــدام ..
   إذا ضحكوا عليك تـاني ..
   واذا قرصوا عليك تاني ..
   ولـو خلّـوك ..
   تبيع نفسك لألفِ شْطان ..
   وفي معلـش لو كان القلـم عَ الـوش ..
   وفي معلـش بالألــوان ..
   أدي معلـش جِنْــزاري ..
   دي لـو مخنــوق ..
   من الحبّ اللى مـدّاري ..
   ودي معلـش دم غــزال ..
   دي لو مجــروح  ..
   ولو م الظّلـم دمّـك سـال ..
   ودي .. درجة سواد الليـل ..
   نصيحة .. خلّـي منها كتيـر ..
   بتنفع .. للّي بختـه يميـل ..
   وتنفـع للّي حِـمـله تقيــل ..
   وبرضه بعد عُمرْ طويـل ..
   ده بِعـد الشّـــر..
   تخلّيـها مع الأنجـال ..
   ح تنفعهـم ..
   وفي معلش للصّحـة ..
   وفي معلش للسخونيـة والكّحـة ..
   وفي معلش للمنحــوس ..
   وفى معلش لو جـالَك عيـا الفيـروس ..
   ولو مش لاقـي تتعـالج ..
   ودى معلش مخصوصة لراحـة البـال ..
   بييجي معاها "ح اعمـل إيـه؟ ..
   ما كلّ الناس كـده عايشــين" ..
   فلو مش لاقي لقمـة حلال ..
   ماتقلقـشي ..
  معاك معلشـتين من دول ..
   تلاقى الدنيا عـال العـال ..
   ومعلشّــات كتير وكتـير ..
   حاجات سينيـه وحاجات تصـدير ..
   ومعلشّــات رجـال أعمــال ..
   ومعلشّــات مقـاس أطفـــال ..
   ومعلشّـات "عشـان خاطـري" ..
   عموماً .. شوف يناسـبك إيــه ..
   يشرفـني انـه تبقـى عمــيل ..

   أنا آسفة أطلت عليك ..
   فلو ملّــيت ..
   خلاص معـلـش ..

هشام حسنى

يونيو - ۲۰۲۰