أنا وياسين - 1

بعد الأربعــين

انا:  ياسين ..يا ياسين .. جربت مرة تحب بعد الاربعين؟
يس: (بضحكة عالية للسما) قلت كام؟؟ 
انا: من غير تريقة.. اسمع بقه! 

يس: معلش كمل ..قوللى طيب .. هيً مين؟؟ 

انا: هي؟ .. هيَ أصغر منِي تلات اربع سنين 

يس: لا يا شيخ.. ناقص تقوللى سلامها بإيديها اليمين 

انا: مش قلت من غير تريقة؟؟.. 

يس: معلش تانى .. هي مين؟ 

انا: قول صحاب ف الشغل .. 

صحاب م النادي .. 

هو يعنِي انت اللى كان اسمك يـس؟؟! 

ثانية واحدة ارد ع المحمول ..

يس: تاخد سيجارة بنكهة المنتول؟؟ 

(والضحكة مالية الوش جايبة لِحَد آخر سنتين) .. 

(وشاورلى على ايده اليمين !!) 

انا: (وهمست من غيظي) 

يارب تولع يا يـس...قول آمـين 

(قالت مساء الخير.. إزيك؟ ..واحشنى..إنت فين؟ 

الشغل واخدك كل ده؟)... وكلام كتير بالشكل ده... 

حسِيت ايديا منملة .. ولقيتني بردان حبتيـن.. 

لو دنيتي تفضل كده.. أحب أعيشها مرتيـن.. 

انا: ايه ده؟؟ .. دا لسه فيه ياسين!! .. وقفنا فين؟؟ 

(ببجاحته شاور تانى ع الايد اليميـن) .. 

فهمت طبعا .. ورجعنا تانى للسؤال: هى مين؟ 

انا: هى ضحية حب أول مضطرب.. 

حالة شغب .. قلة أدب .. 

حب ساذج من بتوع التلمذة .. 

والحب ساعة التلمذة .. بركـان أذى .. 

(ولاقيتنى مش شايف ياسين .. 

وحياتي رجعت اسبوعين .. 

ولاقيتنى باسمع صوتها تانى .. واحشنى تانى .. انت فين؟؟) 

***

من اسبوعين .. 

كان فيه مناسبة حتى مش فاكر لمين .. 

وكنا اهه بنضحك .. نهرج زي كل الموجودين .. 

ماقدرش اقول ان احنا زملا .. كنا برضه قريبين .. 

المهم كلامنا خدنا لقصة كانت من سنين .. 

(ولد ظريف والده كان صارف عليه .. 

الاب يبعت م الخليج .. الام تبعت ع الشاليه .. 

غير التحف .. غير الديكور .. غير النجف سينييه ..) 

والقصة مشيت عادى .. زى اى اتنيـن .. 

طبعا سرحت .. م انت عارف .. مش دى المشكلة .. 

وسمعت حاجة عن " التكافؤ" و "التوافـق" يمكن "بنات النـاس".. 

وف وسط برضه كـلام غريب .. سمعت كلمة "بهدلـة" .. 

ودني الشمال كأنها صلصـال .. 

يس: طب واليمين؟؟ 

انا: ما انت عارف كات عجين .. 

ما بقيتش شايف غير عينين اتنين.. 

وابتسامة وشفتين.. 

وضحكة احلى من الحياة او ضحكتين.. 

وعنيا لو بعدت شوية .. ثانية واحدة .. ثانيتين .. 

بس فجأة .. لقيتنى فُقت .. لما نزلت دمعتين .. 

بدأت اركِز فِـ الكلام .. 

لقيتها بتقوللى حاجات آخر يومين .. 

آخر كلمتين .. 

"رَمْي اليمين" .. 

( أنا إيه حصلي؟؟ م احنا كان كويسين .. 

العينين هما العينين .. 

بس انا عنيا اللى كانوا مغمضين ..

مدِيت إيديا حضنت إيدها .. حد شاف قلب ف ايدين؟؟ 

انا: ياسين .. يا ياسين! .. انت نمت؟؟ 

( ياسين مابيردش .. عينيه متغيرين .. 

ياسين كلامه بيترعش) .. 

إيه يا صاحبى؟ .. مالك؟ 

د نا حتى باحكى القصة انا يصوتى التخين .. 

امال يا صاحبى لو سمعت القصة رنة مندولين؟؟ 

ماقولتليش برضه؟؟ .. 

جربت مرة تحب بعد الاربعين؟؟

هشام حسنى

القاهرة

نوفمبر٢٠١٠