دينَك .. ودِين أُمّــك وابُــوك *

دِينــك وديــن أمّــك وابــوك ..
إنتَ عـارف ديــن أبــوك؟
ولاّ ديــن حبّــة مشــايخ فهّمــوك ..
إن أخــوك مـش هـوّ اخُــوك ..
وان كلّ ولاد شِـارعْـكـو بيـكـرهُـوك ..
وانّ أصحَــاب الطّـفُــولَــة ..
صَـنْـف واطِــى بيِـحْـسـدُوك ..

دِين أَبُــوك ..

ديْــن مشــايخ وَرّطُـــوك؟؟

علّــمــوك شيل السّــــلاح

عّــلمــوا مـراتك تِجاهد .. 

حَتّــى لَـوْ كَــان بالنّـكـاح

لبّــسوا ابنــك كَـفَـــن

و فِـ "المُقَطّــــم"  ..

عّلمــــوك تِعْبُـــد وَثَـــن

والله لو طَلَــبِــتْ مَعاهُــمْ يِقْتِلُـــوك .. لَيِقْتِلُــوك

(حَسْــبِىَ الله .. انْـتُو ميـــن؟ 

انْتُــو شِـلّة مَأْجـــورين .. مَـدْسُــوسيـــن

تِفْـــهَمِ ايــــه فِـ الدّيــــن؟

انْتــو ديـــن حَبّــــة عِيـــــال

ديـن رِخِـيــص .. انتــو دِين بطّــال

انتُــــو دين حبّــة مَــوَالِــى

انتــو دين كـامْ ألْـف للسّلْــطان مُـوالــى

انتــو ديـــن هِــشّــكْ وبِـشّــكْ

انتــو دين وَرّيـنِــى وِشّــكْ

يابْنِــى فُـــوق .. أنا مِـش باغِشّــك

اللّى زيّــك عَنْــدِى .. لِسّـه ماتْـخَلَـقْـش

اللّـى زيّـــك عنْــدِى .. طِــين

اِنْتَ .. ح تعلّمْنِى دين؟؟

والله وسْمِعْــنا انّ للّيـبْرالــى والعِلْمانِــى دِيــن)

أفهم ايه عن ديــنَ أبُــوك؟!

إنّــه ديـن بِيْخـلّى عقْـلَـكْ فِـ "الجَمــاعَة"

مِـشْ مُهِـــم الفِكْـــر

قُـول "سَمعاً وطــاعَة"

زى ما يقــول " النّـقـيب " .. تِسْـتَجِـيْـب

عِيْـشَــة أَصْـــفى من الحَلِــــيب

انّمــا سَــاعة "النّفِـيـــر"

شِــيل سِـلاح زَىّ الحِمِــــير

إتْــرِكِـــبْ .. 

ما انــتَ اصْــلاً جنّـــدوك لَـجْـلِ الرّكــوب

لبّســوك يافْــطِة شَهِـــيد

عَيّـشُـــوك عِـيشــة العَبِــيد

تِتْحِـــرِقْ انتَ واهْلَـــك ..

بَــسّ ما تْمُـــوتْشِ "البِـتــاعَة - الجمــاعة"

(وِانْتــو دِيْــنْ بـــاع الجِـــهاد

دين يِــدلّــع فِـ العِــــباد

ديــن "يا بِيْــــبى .."

ديــن "يـوحّــد" قَبْــل قَفْـــل السّــكّة .. "جايـلِــكْ فِـ المِعــادْ"

ديــن نِسِــى الفُــتُوحــات ..

نِسِــى البُـطُــولات ..

والمَـجْــد اللى فَـــات ..

نِسِــى صَـلاح الـدّيــــن..

نِسِــى حِطّــــين..

ديــن "كيُــــوت" خَـــالِص

حَارْسَــك و صَـايْنَــك

انت لــو عـ "النّـــت"

ماتْشَـــيّرلِـــى ديــن !!)

دينــى فِيــه "حِطّـيــن" صحيح ..

بسّ فيه يُــوم "الجّمَـــل" وفيه "صِفّيــن"

همّـــا دول مــش كانــوا بَرضـه مؤمنين ومسلمين؟

قوللــى ميــن قاتِــــل علِـــى

قوللـى ميــن قَتَـــل الحُسـين

دمّ عَمّـــار بن ياسِــر ... شايِله مين؟

اللـــى كـــان فـــى الحَــرْب غَـــزُّه؟

ولاّ كــــان عَـ الحَـــرْب وَزُّه؟

قوللى فِيه كام الْــف ماتوا مَفْـتُــونِيْــن..

كُلّــــه باسْـــم الدّيـــــــن ..

ولّا دُول مالْــهُومْــش عَنْـــد الباشا ديــن؟؟

(الّلى ماتُـوا من سِنِين ..

والّلى ماتُـوا مِن يُومين ..

شُفْتُهُم زىّ الملايكة منَوّرين

العابدين .. السّاجِدين ..

المَقْتُولِيـن .. المَحْرُوقِين

أصْلِى مش زيّك شايفهم .. "مخطوفين"

الصّلاة .. أمْضَى سِلاح

والصّيام .. للرّوح رَوَاح

والقِيام .. حتّى الصّباح

والشّهيد لو تِسْأَلُه .. يِرْجَع يموت

أصل رُوحُه .. عارْفه هىّ رايحَة فين)

دينــى مِـشْ حَـبّـــة طُقُـــوس

دينــى مـْش عَـ النّــاس يِـدُوس

دينــى ما يْـوَزّعْــشِ سُـكّـر او فلـــوس

دينــى مِـشْ صُــوت انْتِــخابـــى

مـش حَبِيْـــس مَشْـــروع ضَبـــابِـى

دينــى بيْحــافظ علــى كُــلّ الّنّفُــــوس

دينــى مايْدَخّــلشِ جَنّــة .. بالصّكُـــوك

دينــى مايْقُـــولّْكْــــش اكْــــدِبْ

دينــى مايْقُــولّكْـــــش احْـرَق .. 

دينــى مايْقُــولّكْـــــش اقْتِــــل ..

دِيـــن ماقالْــش لمَصْــــر "طُــزْ" ..

هَـــات أجــانِب يِحْكُمــوك ..أو  يِنْقِــــذوك

هُـــوّ ده دينــــى ..

وديـــن أمّـــــــك ..

وفـَـــاكِرْ ..

هُـوّ دَه كَــان دِيْــن ابُــوك

بَــسّ أَنْـصَــاف المَشـــايخ عَـلّمُــــوك

ان غِيـــر ديـنَــــك ضَــــلال

حتّـــــى لَــــوْ كَــــــان دِيــــن أَبُــــــوك

 هشَام حُسْنِى

القَاهِرَة

أغُسْطُس ٢٠١٣

* رؤية نصية: د. حسن بدير