Monday, 22 December 2014

جُـورُو الحَكــيم

(عـمّ جُـورو .. عـمّ جُـورو ..
بصّـه عـ الـواد والنّبـي .. مـوْجـوع فـ زوره ..
تانـي مـرّه الشـهـر ده ..
دور اللـوَز يقعد كـده ..
الـدّور يادوبـك ينكشح .. يرجـع يزوره ..
إنـت مـش دكتور ياجـورو؟؟)

رد "جورو" بصوت رخيـم ..
بص يابنييي .. جـورو دي يعني الحكيم ..
مش باشْحكـيم !!
يعني واحد عنده رؤية للطبيـعـة ..
(ما الطبيعة دِ مشكـلة عبدالكـريم ..
هو أصلُـه أكـول شوية) ..
جورو شكلـه ماخـدش باله .. عـدّاهالُـه ..
هو بيهَـرْتِل وجـورو يقـول ومالُـه ..
جـورو بيفكر فـ واحـد للسيناريو ..
كومبليتلي شكل "غـيـدا "..
بس بائـس عـ الحـديـدة ..
انت ممكـن يابنـي تتحـوّل بلُـونْد؟
    (اتحـوّل؟؟ بـلونــد؟!! ..
    كارت شحـن بعشّــة اقلـب جيمـس بــوند ..
    هـوّ ﻻزم دا عشـان الـواد يِخِــف؟؟)
شكلـه شـاب بيـستـخـف ..
الولــد فعلا بيتكـلم بجـد ..
ايّ حاجـة بكـارت شحـن ..
المهـم المصلحـة .. ولأي حـد ..
وبأي حــدّ ..
     (عـمّ جـورو سكـتّ ليـه؟؟
    لـو زعلـت خـلاص .. بــلاش ..
     نـرجـع التأميــن ..
    اخْـرِة التأميـن راوِنْـد ومتـر شـاش ..
     ماانت عـارِف ..
    والعـلاج .. لوْ مـش حـ ينفـع نشـرَبُـه ..
    ينـفع نبـيعُـه ..
    برضـه نتْـمنْـظَر بـريعُــه ..
    بس اوعـى تكـون عاوِزْنـي عشـان أجنـده ..
    او عشـان كـاره "شـاهنـده" ..
    كلّـهم قبلـك جابـوني بكـارت شحـن ..
    مـرّة عشّــة ومـرّة ميّــة ..
    كلّـهـم تاجْــروا بـدمّــي ..
    دول بتــوع الليبـراليـــة ..
    ودول بتـوع العـلمـانيـة ..
    ودول بتـوع الجنّـة اهيّـه ..
    والحكـايــة هِـيّـا هِـيّــا ..
    سـنْـدوتـش وكـارت شحـن ..
    وذلّ طـحـــن ..
    قوللي إنـتِ ايــه نظـامـك..
    لـو حـ تِقــدر تخـتــلف .. حـ اسمـع كـلامـك..
   حـتّـى لـو كــان مِــرّ عَـلْـقَــم ..
    مَـرْضِي يـابــا؟؟؟
    يـاﻻ ذِيـعُـــوا ....)

هشام حسنى  
القاهرة        
ديسمبر - ٢٠١٤ 

Wednesday, 29 October 2014

الـمُنْـتِـــــج

وانْـت جَــايْلـــى ..

هـات مَعَــاك  حـبّــة أَسَــامِـى ..
"ســامـى" .. "رامــى"..
 أىّ حَــاجَــة ..
رُصّــهُــم كِـدَهُــه أمَــامِـــى ..
الـوَلَــد دَه  .. إعْـتصَامِــى ..
والوَلَــد دَه .. إنْـتِقَــامِـــى ..
لأ .. بَــلاشْ دَه ..
شَـكْــلُه يــدّي علــى انْـهِـزامِـى ..

حِــلوْ خــالـص ..

قُـول لهم أنــا أبقَــى ميـن!!
إنْـتَ عَـارِف انَــا ابْـقَـى ميــن؟؟
اللــى مـايْـهِـمّــوش أسَــامِــى ..
قَـلْــب بَــارِد .. قَـلْــب حَـامِـى ..
اللــى بِـيْـفَـصّـل أسَــامِــى ..
اللــى بـيْـخَـلّـيــك مُـهَـذّب أو حَـرامِـى ..
قُــلت رأيَــــك؟؟
خَـلّــى رأيَــك جَـنْـب رأيُــه عـنْـد "مـامـى" ..
كُـل أفْــكـارَك وأحــلامَك كَـلامــى ..
واحْـتــرامــك .. بـعــد ماتْـنُــول احْتِــرامـى ..
والتِــــزامَــك شــيء مـا يعـنِـيـــش التِــزامِــى ..
أصْــل انـا الإنْـتــاج .. أنـا الشّــيك المِـكَـلْـبَــظ ..
أنـا الشّـخْــص الــلى عُـمْــر مَــا حَــدْ يِسْــتَحْمِــل خِصَامِـى!!

هشام حسنى
القاهرة   
اكتوبر - ٢٠١٤

Sunday, 19 October 2014

عَـلــى فِكــــــرَة

عَلى فِكْــرَة ..
أنـا مِشْ خـايْفَــة من بُـكْـــرة ..
عَشَــان بُكْــرَة فـ عِلْــم الغِيْـب ..
عَشـان بُـكْـرَة يـا دُوب فِكْــرَة ..
أنا خَـايفَــة مِن امْـبــارِح ..
مِن الفِكْـر اللـى بـاتْ سارِح ..
مِن البَـال اللـى باتْ مَشْـغُول ..
ومِينْ كَانْ قَـال ومِين بيقُــول ..
ومينْ عـ اللـى احْنـا فِيه مَسْئـول ..
أنـا خَايفــة عَـليـك منّــى ..
أنـا خايفــة أوى اكْمِنّــى ..
باخَـافْ ماقْـدَرْش أتْسَـامِح ..
أو اتْصَـالِــح ..
علـى فِـكْــرَة ..
أنا خايْفَـة علَى بُكْـرَة .. مِن امبَـارح

مَاتِـزْعَـلْـشِــي ..
عَشَــان لَـوْ كُـنْـت حَـ انْـدَهْـلَـك بِإِسْـمَـكْ بَـس ..
"حَبِـيبِـي" صَعْـب اقُـولْهَـالَـك ولَـوْ بالهَمْـس ..
ويـامـا زَمَـان كَـلام ماتْـقَـالْـشِ بَـس اتْحَــس ..
مَـاتِـقْـلَـقْـشِي ..
حَـاجَـات واضْـحَـة وعَـارْفِـينْـها .. وُضُوح الشّـمْـس ..
أنَـا عُـمْـرِى مَا حَـ اقْـسَـى عَـليـك ..لا لأْ بالعَـكْــس ..

ويِـمْـكِــن تَـانِـى نِـبْـقَـى صحَـــاب ..
ولَــوْ مـشْ كُــل أحْـلامْـنـا حَـ تِـتْـحَـقّــق ..
حَـ يِفْـضَـلْ حِـلْــم ولّا اتنـين عَشَـان نِبْـدَأْ ..
نِـحَـاوِلْ تَـانِـى نِـبْقَـى اصْحَــاب ..
وعُـمْرِ اللى ابْتَـدا بينّــا ما يِبْـقَى سَـرَاب ..
اقُـول لك ليـه؟
عَشَـان قَلْبـى امّا قـال إنّـك مَـاحَبّـتْـنِـيش ..
دُمُـوعَـك يُومْهَـا قالِـت "لأْ" وكات أَصْـدَق ..

هشام حسنى
القاهرة    
اكتوبر ٢٠١٤ 

Sunday, 5 October 2014

فَـحْـت الكَــنال

( إحْنـا اللّــى دَهَنّــا الهَـوا دُوكُـو ..
واحنَـا اللّـى فَتَـلْنَـا الرّمْـل حبـال ..
عَلّمْنــا علِيــكو وعلى ابــوكو ..
وفَحَتْـنا كَنَـال كِـده جَْنـب كَنَـال ..

احْتَـسْـت عَشَـان تِشْـحَـت مليـار ..
من شَرْق وغـرب يمـين وشمـال ..
"أبو نهضة" باينّـه خلاص اهُو طار ..
طـراييش مادّوش ولا شيـخ بِعقـال؟

لـو نِفْـسـك بَـقَـه تِتْـعلّم كـار ..
إتْـفـرّج بَقَـه عَـ الشّغْــل ازّاى ..
سِتّـيــن مليـار .. لأْ واستِثْـمـار ..
عَلى بـال ما شرِبْتَ اْنـا واحِـد شاى ..)


"أنـا بِينـى وبيـنَك كُـرْه وتــار ..
مشْ ميّـه ورَمْــل ولِعْب عيـال ..
فى حـديـد وسجُـون وحقُـوق ثـوّار ..
ووَطَـن مَخْـطُـوف ورئِيـس اتْـشـال ..
فى بينِى وبيـنَك شُـهَـدا ألُــوف ..
إشِـي ماتْ مَحْـرُوق واشِـي مات بعْيـار ..
فى الأرْض ما عِـرْفُـمْ طَعْـم الخُــوف ..
فِـ السّمـا بيْـطُـوفـوا مَعَ الأبْــرَار .."

(ماسْـمِعْتِـش عَـن شُـهَـدا لتَـنْظِـيـم ..
يا شَـهِـيد لِـوَطَـن يا شَهِـيد لحْـدُود ..
دَه وَطَـن مُـشْ خَـاضِـع للتَـقْسِـيم ..
ولا فِـكْـر عَتِـيـق مَسْـكُون بالـدّود ..
دَه وَطَـن مُـش خَاضِـع للّـتقْـيــيم ..
و فـ بَطْـن رمـالُه شهِـيد مَوْلـود ..

بيـن وَطَـنِى ووطَنَــك فَـرْق عظِـيم ..
دَه وَطَن بيْـزُول .. دَه وَطَـن مَوْجُـود ..)

هشام حسنى
القاهرة   
اكتوبر ٢٠١٤   

Friday, 12 September 2014

أشـلاءٌ تهْــــــــواكِ


إنّــى راحــــلُ ... أرجُـــوك لا تــبْـــكِ عليّــــــا
إنّــى راحــــلُ ... قـــدّمــتُ أحـلـــى ما لديـّـــــا
ألفيــــتُ حبـكِ ... مــاءً تســـرّب من يــــديّـــا
قــــدّمــتِ غـــــدركِ وابـتســـــــامَـتَـكِ إليّـــــــا

                *   *   *

قَــــــــدْ كــــانَ ذنْــبِــــــــى أن هـــــوَيْــــــــتْ
قَـــــــــدْ كــــانَ خـــطــــــأى أن خُـــــدِعْـــــتْ
قَدْ كـانَ جُـرْمى أن رأَيْتُ النّار ثم بيدىّ اقتربْت

                *   *   *

حَــاوَلْتُ يومـاً أنْ أَكُـون إلـيكِ أكـثرَ منْ حَـبيبْ
وظَنـنْتُ يومـاً أنْ يَطِـيبَ الجُـرْحُ بِعذابِ الطبيبْ
لكـنّ جُـرْحِى لَمْ يَعَـدْ يَهْوَى الـدّواءَ ولا الطبيبْ

                *   *   *

إنّــــى أُجَـــــاهِـــــدُ ذاكِـــــــرَتى .. لِتَـْنـــســاكِ
إنّـــــــى أُحــــــاولُ دَفْـــــــــنَ ذِكْــــــــــــــــراكِ
فَشِغَـافُ قَلْبى قُـطّـعَت ْ.. وذاكَ ما صَـنَعَتْ يـداكِ
لكنّ قلْبِى .. وَهْوَ أشْلاءٌ بِصَدْرى .. جَدّ يَهْـواكِ

هشام حسنى
القاهرة  
١٩٨٩  

Sunday, 17 August 2014

آخـــر الشّهـــر

لِآخْــرِ الشَــهْــر ..
مَعَــاك مُهْــلَة لآخْـر الشّهْــر ..
تقُول لى خَلاصْ حَـ تِعْمِـل إيه ..
سِنِيــن عُمْــرِى اللى فاتِت ليـه ..
أفَــرّحْ قَـلْبِـــي واطّـمّــن ..
عَشَـان لِسّــه انْتَ باقِـى عَلِيــه؟

شُعُـورى بِيــك مِعـذّبنـى ..
شُعور نِفْسـي يكُون كـدّاب ..
شُعور بيقُـول لـى حَـ تسِيبْنـي ..
نحَــاول تـانى نِبْقـى اصحاب؟

حَـ يِنْفَـعْ مــرّة نِتْقـابِـلْ .. ومِا انْـداهْلَــكْـش؟
حَـ يِنْفَـعْ مـرّة تِوْحَشْنى .. وما اشْتاقْـلَـكْـش؟

حَـ يِيجِـي اليُــوم ونِتْكَــلّم .. كـلام أغْـــراب؟

وحَـ اعْمِــل إيـه لِآخْــر الشّهْــر؟
أشُــوفُه  .. وﻻّ مايصَحّــش؟
خَـــلاص تِلِيـفــون ..
واذا مــا رِدّش؟
يكُـون دَه هـوّ آخِــر رَدّ؟
مَعْـقُــولَة الكّلام دَه بجَـد؟
نِهـايِة دُنْيِتــى عَنْـــدَك ..
جَـرَس تِليفــون؟
أكِيــد مَشْغُــول ..
شـويّة أكِيــد حَـ يِتْكَلّــم ..
أقُول لك ليــه؟ ..

زَمَــان .. 

سَـاعَـات كُنّـــا بِنِـتْـقَابِــل ..
فِـ زَحْمِـــة شُـغْـــــل ..
وكُـنّـــا قَبْـــل ما نْسِــلّم ..
سَـــلام الإيـــد ..
نِقُــول بالعـيـن ..
تقُـول لى انّـك وَرَاك حَاجَـة ..
دقِيـقَــة اتـنْــيــن ..
وارُدّ عَلِيـــك .. وتِفْـهَـمْنِــى ..
"خَـلاص بِعْديـــن .."
وتِـرْجَعْـــلِى ..
مافـاتْـش كتِيـــر ..
وعُـمْـر ما كُنّــا نِتْعَــاتِب ..
عَلَى التّـــأخيـــر ..
بَـــدَلْ ما وَحَشْـتِنــي مَـرّة ..
واحِـشْـنى كتيــــر ..

وأعْمِـــل إيــــه؟
خَلاص فـاضِلْ يا دُوب كَـام يُـوم ..
أنـا عَـايْشَـــة الكّـلامْ دَه بجَـــد؟
أكِلّـــم مِيـن؟ .. يرَيّـحْنِـــى ..
أنــا خـايْفَـــة أكِــلّــم حَــــد!!

هشام حسنى     
القاهرة        
أغسطس - ٢٠١٤     


Thursday, 24 July 2014

الـدّروس المُستَفـادة

مِـ الدّروس المُستَفـادة ..
فيها سادة وفيها عَــادة ..
فيها ناس سكّر زيــادة ..
فيها ناس مش شايفة فيها .. غير بيادة
بس بتبوس إيـد فضيلتــه ..
عادى من ضِمْن العبـادة ..

مِـ الدّروس المستفادة .. المُزايـدة ..
حـدّ عارف يعنى إيـه كلمة مزايدة؟؟
يعنى كلّـه عند كلّـه بيقى خاين ..
يعنى كلّـه بـ دِيْـل وبايِـن ..
حُــط زَخَمَــك جَنْب زخمــى ..
هات حَـراكَــك ..
لسّــه حَبّـــة ..
طَبّـب الكَـفّــة بلفّــة عَـ البَـرامج ..
برضـه حبّــة ..
ميـن ظَهِيـرك؟؟
نُخْـبَــة نُخْـبَــة ولاّ شَعْبِــى؟؟
شِـيـلْ وعـبّــى ..
هات معاك الناس بتُـوعك ..
سِـدّ جُـوعــك ..
حِلْــو خالـص ..
يالاّ نعمـل مؤتمــر ..
انت فـ شمال المنصّــة ..
قول لناسَـك بعد بَصّــة ..
تِشعِـل الجوّ بـهِتــــاف ..
آه يا خايـن .. ياازْدواجـى ..
هوّ ده برضـه الهتـــاف؟؟
فيـن هِتافــى؟؟
"المُظاهــرة بمَنْ حضـرْ" ..
آه يا واطـى ما لـو طَمَــر ..
ماكانـش بـاظ المُـؤتمَــر ..

مِـ الدّروس المستفادة .. الشّهــادة ..
أىّ مـوتَــة بَقِــت شَهَـــادة ..
طلْــق نارى .. جُــرح غـائــر ..
شَخص عَـادى .. شخص فاجِـر ..
المهـم معاك شهادة من الأميـرى ..
ان ضرب النّـار ده ميــرى ..
الشهادة بيـيجـى مِيتْ ألف وزيــادة ..
والشهاده معاها بُونَــص ..
مـرّة شقّـــة ..
مـرّة شُغْلَــة ..
مـرّة غِنْــوة وطقــم كُورَس ..
كِلمــة منّــى..
بصّ لـو قابْلَــك جَـرِيـح ..
قبْـل ما تفكّـر تساعْــده .. صَوّره ..
كَـام كلِيـب وشيّــره ..
وان فِضِل فيــه بعض رُوح ..
ابقـى شُـوف مِين عَـوّرُه؟؟
مش مُهم يمُـوت فِطِيـس ..
المهم النّـاس تِهِيــص ..
اوْعَـى تِنْســى !!
أىّ وَرَقــة من الأَمِيـري ..
إنّ ضَرْب النّـار دَه ميري ..

مِـ الدّروس المستفـادة ..
ربّنـا يدِيمْهـالْنـا عَــاده ..
بعْــد ما نعَيّــط ثَوانـى ..
ونِقْـلِب الحُـزْن لأغاني ..
هىّ نفـس العَـلْقِـة تانى ..
قوللى آخِر ضَرْب كَلْتُـه..
يِفْـرِق إيـه مِـ الأوّلانِـى؟؟
غِيرْش لجْنـة تقُول لِلَجنـة ..
" .. والتّكــرّم بالإفَـادة"
وامّا نِتْقَصّــى الحقايِـــق ..
نِبْقَــى نِـدّى بَدَل إجَــادة ..
شُغْـل فاخِـر والمُهَيْمِــن ..
شُغْـل يِسْتَــاهل إشَـــادة ..
ربّنــا يِدِيـمْـهالنــا عـادة ..

والــدّروس المُسْتـفـــادة ..
حتّى لَـو تطلُــب زِيــادة ..
أصْلِنــا بنشرَبهَــا سَـادَة ..

هِشـام حُسنـى 
القاهرة       
يوليو - ٢٠١٤  




Saturday, 29 March 2014

قَيْسِــي أُحِبّــك


قَـلْـبِـــي يُـحَـدّثُـنِـي يَـقُــــولُ تُـحِـبّـــــكَ
مَـنْ ذَا الِـذي بِـالـحُــبّ عَـنْـهَـا أَخْبَرَهْ

أَتُــرَاهَــا بَـاحَــتْ بِـالهَـــوَى أَمْ اَنّـهَـا
كَـتَـمَـتْــهُ فَـاعْتَـرَفَــتْ عُيُـونٌ سَاحِرَة

أَمْ أَنّ هَــذَا الـحُـبّ مَـحْــضُ تَـخَـيّـــلٍ
يَـلْهُــو كَـطِـفْــلٍ بِـالـقُـلُـوبِ الـحَـائِــرَة

وَغَــدا سَـيَـمْـضِـي غَـيْـرَ مُـكْـتَرِثٍ بِـهِ
ويُــضَـافُ قَـلْبِــي لِلْحَـكَـايَـا السّـاخِـرَة

*   *   *

"صَـــدّقْ فُــؤَادَكَ يَـــا هَـــوَايَ فِـإنّنـي
كَــمْ بِــتّ أَحْـكِــي للنّجُــومِ السّــاهِـرَة

كَـــمْ بِــتّ أَحْـلُــمُ أَنّـنِــي لَـيْلَــى الّتِــي
قَيْــسٌ حَـبَـاهَــا بِـالقَــوَافِــي النَـــادِرَة

حَـطّـمْـتُ أَصْـفَـادَ الحَـيَــاءِ جَـمِـيعَهَـــا
وَنَثَــرْتُـهَــا وَمَـضَـيْـتُ نَـحْـوَكَ سَافِـرَة

قَيْـسِـــي أُحِـبّـكَ فَـاحْتَـوِينِـي وَارْتَحِــلْ
قَدْ عِشْتُ عُمْرِي فِي هَوَاكَ مُهَاجِرَة"

*   *   *

فِـي رَاحَـتَـيّ ضَعِـي يَـدَيْــكِ دَعِـيـهِـمَـا
وَدَعِــي عُـيُونِــي فِـي عُـيُـونِكِ مُبْحِرَة

فَـلَـكَــمْ نَـسَجْـتُ مِـنَ القَـصِيــدِ بِـحُبّــكِ
لَـيْـتَ القَــوَافِـي عَنْ هَــوَايَ مُـعَـبِّــرَة

الآنَ أَشْــعُـــرُ بِـالْوُجُــودِ يَــضُــمُّــنِــي
وَبِـــكُـــلِّ آيَــاتِ الـجَـــمَـــالِ الآسِــــرَة

فَــالْحُــبُّ يِـبْــعَــثُ فِـي الحَيَـاةِ بَهَاءَهَـا
مَــرَّتْ سُـنُـونُ الـعُـمْــرِ قٌـبْلَــكِ فَـاتِــرَة

هِشَــام حُسْنِـي
القَاهِرَة       

Monday, 3 March 2014

البَطَــل

إن كان حبـيـبك عَسَل ..
ماتْخلّـصُوش كُـلّـه ..

وان كُنْت شايفُه بَطَـل ..
خَاف عَـ البَطَـل قُول لُه ..

وَعّيـه مِنِ اللّي اتْفَـتَـن ..
بِيْـبُوس تُـراب ضِلّــه ..

واحْكِيلُه عـ اللّى اتْسَجَـن ..
لَقَــى نـاسُــه بِتْــذلّـه ..

وجِه "بِـتاع ربّـنـا" ..
قَام فَـشّ فِيـه غِـلّـه ..

شَهرين تَلاتَة اربَعَة ..
الخِـلّ سِـاب خِـلّــه ..

"حَرَكــات" ومتْجمّعَــة ..
كَـنْــدُوز علـى بتِــــلّو

شَرّف فِـ "حُـوض السّمَـك" ..
"رَمَضان كَـريم حَلّــو" ..


*   *   *

فَـرعون؟ وإيـه فَرْعَنُــه ..
غِيـر اللّى طبّــلّه ..

"بُكْـرَة تشُوفـوا العَجَـب ..
هِـلّـوا يا نَـاس هِـلّـوا" ..

أوّل ما شَاف "الحَنَـش" ..
لقَـفِ "العَصَــا" كُلّـه ..

سَجَـد لمُـوسَـى النّبـى ..
فَرْعُـونُه ما أذِنْ لُـه ..

يُومِيـن وسَابُـوا البَـلَد ..
خـايفِـيـن لَيِوْصَلّــوا ..

عَـدّوا البُحُـور بالعَجَـل..
مِن غِيـر ما يِتْبَــلّوا ..

طِلِـع "الكَلِيــم" الجَبَـل ..
ربّــه هِناك قَـال لُـــه ..

رِجِــع مَعَــاه "اللِّــوَح" ..
عَـ الحَـقّ بِيْــدِلّــوا ..

لَقَــى حُثَــالة البَشَــر ..
لـ"العِجْــل" بِيْصَــلّوا ..


*   *   *

هِيّ الحِكَــايَة كِـدَه ..
نَاس عَـاوْزَه يِتْسَــلّوا ..

لَوْ تِرْضِـي يُوم نُصّهُـم ..
النّـصّ يِتْـشَـلّوا ..

شُوف كَـام بَطَـل واتْهَطَــل ..
شُوف كَـام مَلِـك وَلّــوا ..

كِيفْ مَا تِكُـونُوا تِنُـولُـوا ..
مِن دَقْنُــه وافْتِــلّوا ..

وانْ كان حَبِـيْبَـك عَسَـل ..
ماتْخَلّصُــوش كُلّــه ..

وانْ كُنـت شَايْفُــه بَطَـل ..
مِيــل عَـ البَطَــل قُـول لُـه ..

لَـوْ شَـال نِحَــاس البِــدَل ..
حَـاسِـب لَـ يِتْـخَــلّـــوا ..


هِشَام حُسْنِي     
القاهرة     
مارس - ٢٠١٤      


Sunday, 2 February 2014

الإخْــوة المُـواطِنُــون

المُواطِن (١)
دُستُور بِيادتَـك ..
شُوف سَعَادتـك ..
بِلّه واشْرَب ميّتُـه ..

دُستُور نيافتَـك ..
شُوف سَمَاحتَـك ..
مَرمِي برّه بلفّتـه ..

جَايِبْلِـي كام طَرْطُور ..
وحِزب "الــزّور" ..
وعامِـل لَجْنِتُـه ؟؟ ..

بُكرَه حَـ ييجـي الـدَور ..
عليك ونثُـور ..
ونِحـرَق جُثّتُـه ..

*   *   *

المُواطِن (٢)
خَلاص بَقَى اسمُـه "الـزّور" ؟ ..
طَفِيتُـوا "النّــور" ..
ورَاحِتْ بَهْجِتُــه ؟..


مُش كُنَـا فِـ "التّيّــار" ..
شُيُـوخ أَخْيَــار ..
تِبَـارِك ثَـوْرِتُـه ؟؟ ..

كَـلْتُـم كَبَــاب وطيُـور ..
فِطَــار وسحُــور ..
وكانِـت قَعْــدِتُـه ..

تِخْتِــم بسُورْة "النّــور"
وذِكْــر الحُــور ..
يرَطّــب خَتْمِـتُـه ..

*   *   *

المُواطِن (٣)
عَفْــواً يا افَنْــدِم ..
عَـاوز اقــدّم ..
صُـورَة شَامـلَة مُجْـمَلَـة ..

كَــمّ التّنَــاحُر ..
والتّنَــافُر ..
هُـوّ لُـبّ المُشْـكِـلَة

يِلْزَمْنَــا آلِيّــات ..
وتِقْـنِيّــات ..
تُضَـاهِي المَرْحَلَــة ..

"بَارْدُون شِيـرِي ..
أَيْـس-فـرِي" ..
أَظُــنّ واضْحَــة المَسْألَـة ..


*   *   *

المُواطِن (٤)
إسْمَـعْ يـا شَاطِــر ..
مِــ العَسَــاكِر  ..
هِيّ كِلْمَــة وتِتْسِمِــع ..

تِعْمِــل لَبَــطْ ..
تِنْشُــر عَبَــطْ ..
بُكْــرَة الجّـرايِــد تِتْمِـنِعْ ..

عَامِــل فِـدَائِــي ..
كَائِــن فَضَــائِي ..
أنـا الّلي سَـايْبَــك تِتْمِـرِعْ ..

تُقْــعُد تِـكَاكِــي ..
ما خُــدشِ "كَــاكِــي" ..
خَـلاص "جَـاكِتّـة" وتِتْقِــلِع ..

*   *   *

المُواطِن (٥)
يااهْـل السّـياسَــة ..
والكَيَـاسَــة ..
لَـوْ سَمَحْـتُولِي بـ عَتَـب ..

أنـا المِثَــالِي ..
عايِشْ فِـ حـالِي ..
وعُمْـري ما شارِكْـت فـ شَغَــب ..

تَعْلِيــم عِيَــالِي ..
ده كُــلّ مَــالِي ..
العَفْــو لَــوْ سَــاء الأَدَب ..

مُمْـكِنْ "وَطَــنْ" ..
سَتْــر وسَكَــن ..
مِش مِيكْـروبـاص "تَـحْـت الطَــلَب"


هِشَام حُسْني  
القَاهرة     
فبراير - ٢٠١٤ 

Wednesday, 8 January 2014

سُـوءْ صِنَــاعَة

هِجْرَة وَاحِـد .. هِجْـرَة وَاحِـد ..
هِـجّ يابْني العُمْـر واحِد
نُـطّ دا المَرْكِب بِتِغْـرَق ..
مُش حَـ يِطْلَـع مِنْهـا واحِـد ..

داحْنَـا لَمّـا لِعِبنـا كُـورَة ..
إتْلَـزَقْنَـا سِتّـة واحِـد ..
وَامّا حَسّينـا بْخُطُــورَة ..
إتْقَسَمْنَـا لألْـف واحِـد ..

الّلي كَان مَفْتُـون بثَـوْرَة ..
واللّي كَان عَامِـل مُنَـاورَة ..
والسّهُنّ المِسْتَخَبّـي ..
خَلْـف "صُوت المَرْأة عَـوْرَة" ..

واللّي عايِـش فِـ اللّـذَاذَة ..
بيـن سِيجَـارَة وبيـن إزَازَة ..
واللي فاكِر نَفْسُـه حَاجَـة ..
وهوّ فَسْـل مَالُـوهْشِ عَـازَه ..

واللي مُشْ طَـايِقِ العَسَـاكِرْ ..
واللي مُش عَـاوِز يِـذَاكِـرْ ..
واللي قَـالِ "ايّـاكْـشِ تِـْولَـعْ" ..
بَسّ خَلّـيلِي "المَعَـابِـر" ..

واللي شايْفِ الكُـلّ كَـافِـرْ ..
واللي بالإلْحَـاد مِجَـاهِـر ..
واللي عَنْـدُه النّاس بلِيّـة .. 
أوْ بكَـارِعْ .. أو بحَـافِـر ..

واللي بِتْـلَوّن ضَوَافِـر ..
واللي عَـ اللّقْـمَة يِعَـافِـر .. 
واللي ثَـوْرِي فَـوْرِي جِـدّاً .. 
مِن بِعِيـد عَلَشَان مِسَـافِر ..

واللّي نِفْسُـه فـ أيّ حَـاجَة ..
واللّي عِينُـه عَـ الخَـوَاجَة ..
واللّي سَـاكِنْ فِـ البَـرَامِج .. 
حُجّـة فِي عِلْــمِ السّمَاجَـة ..

واللّي بِيْـظَبّـطْ فِضِيحَـة ..
واللّي عَرْبِـنْ عَـ الدَبِيـحَـة ..
واللّي لازِم فِـ السّينَـاريـو ..
يِبْقَـى فيه ألفَـاظ قَبِيحَــة ..


واللَي شَـال اللّيـلَة خَلّـص ..
واللّي قَال لّه يَا عَـمّ نَصّـص ..
واللّي مُش عَـاوِز يفَــرّط ..
فِـ المُقَنّـن والمُخّصّـص ..

سِيـدْنا "يُوسِـف" بَرْضُـه نَقّـى ..
لمّـا كَان عَـ الحِلْـو دَقّــه ..
والقَمِيص مَقْطُـوع وبَايِـنْ ..
إتْحَبَـسْ و"السّـتّ" ﻷَ ..

هِيّ دِي أحسَـن بضَـاعة ..
فِيكِي يا سُـوق الوَضاعَة؟؟
لِمّ يابْنِـي الفَـرْش شِطّـب ..
الحِـكَايَــة .. "سُــوءْ صِنَـاعَة" ..




هِشـام حُسْنِـي
القَاهـرة      
يناير - ٢٠١٤ 



Wednesday, 1 January 2014

الحِلْــم

شُكْراً عَلَى الحِلْم الجَمِيـل ..
إدّالِي فُرْصَة أكَلّمِـك ..
أوْصِفْ مَشَاعْرِي وافَهّمِك ..
أشْرَحْلِك المَوْضُوع ..
وإنْ خِلِص الكَلام ..
أسِيب عِنَيّـا تقُـول وتِحْكِـي وتِرْسِمِـك ..

زَعْلانَة مِنّي عَشَان حَكِيت؟
حَقّك عَلَيّا ماتِزْعَلِيـش ..
أصْل الحِكَايـة وفَصْلَـها ..
أنا بَس كَلّمْتِـك كِتِيـر ومَارَدّتِيـش ..
مَا بَقِيـتْـش عَارِف أَعْمـل ايْه..
فِي حَاجَة ولّا ﻷ مَفِيـش؟

ما جَاوِبْتِـينِيـش !! ..


حبّـة مَشَاعِـر مِـ القَلَـق ..
هِرْبِـتْ وجِرْيِـت واسْتَخَبّـتْ فِـ الوَرَق ..
كَتَبِـتْ حِكَـايَة مَاتِتْنِسِيـش ..
ومَا تِنْـتِهِيـش ..
مَعْقُولَة نِنْسَـى ازّاي نِعِيـش؟ 

مِشْ كُلّ حَاجَـة زَمَـان عِرِفْنَـاها سَوَا؟
مِشْ وَاحْدَة وَاحْدَة ذَاكِرْنَا فِـ كتَـاب الهَوَى؟
مِش قَالُوا فِـ كتَاب الهَوَى ..
دَا مَالُـوش دَوَا؟

وبابْتِسَامَة قصَيّرَة ..
وِعْنِيـن بِيِمْـلاها الكُسُوف مِتْحَيّـرَة ..
رَدّتْ بِكِلْمَـة صغَيّـرَة ..

"عَلَشان نحَافِـظ عَـ الحَيَـاة مِنْ غِيـر أَلَـم ..
عَلَشَان نِعَيـش مِنْ غِيـر نَـدَم ..
لازِمْ كَـلامَـك يِتْحِسِـبْ ..
مشْ كُلّ حَاجَة نِعِيشْهـا ..
يِنْفَـعْ تِتْـكِتِـب"


هِشَام حُسْنِي
القاهرة     
٢٠١٤