تَعَاشَّب شاي

تَعَاشّب شاى ..
وقوللى حـ تُحْكُموها ازّاي؟

بِحَدّ السّيف؟؟

بِشُغْل الكّيف؟؟

برِقّ وعود وطبلة وناي؟

تَعَاشّب شاي ..

وقوللى حـ تُحْكُموها ازّاي؟

حـ تِعْمل إيه مع اصْحابى ؟؟

حـ تعْمل إيه فـ وَهّابي؟؟

حـ تعْمل إيه فـ عمّ بشَاي؟
حـ تِسْمَحْلُه يخُشّ الجِيش؟
حـ تاخٌدْ مِنّه دَعْم العِيْش؟
حـ يدفع جِزية مَعْقُولة يَنَايْرِ الجّاي؟

تعَاشّب شاي ..

وقوللّي حـ تِحْسِبوها ازّاي ..

ضَرايب الفودْكا والبِيْرَة ..

يَجُوز نِشرَبْها تصبيرة ..

ونِسنِدها إذا شِئتُم ..

بحِتّة جِبْنَة وِفْطِيرَة ..

وتَعْمِيرَة ..
واذا خِلِص الغُمُوس مِنّي ..
وانا قاعِدْ ومِسْتَنّى ..

مِتِيْن مِلْيار ..
حـ تاخُدْ قَرْض ..
وبَعْدِ القِرْض تاخُدْ قَرْض ..
بِدُون فَايْدَة ..
يادُوب كَام أَلْف مَحْسُوبَة ..
لِزُوم النّقْل والتَشْوِيْن .. وسَبّوبَة

ماجَاش القَرْض
وكَمّلْت السّلَف أَعْذَار
وضَيّعْت المِتِين مِلْيار
كَلَام فَارِغ وشُغْل هزَار
وسَلّمْلِي علَى الثّوار
وخُدْ بُوسَة وحُضْن مَطَار

تَعَاشّب شَاي ..

وقوللّي حـ تِحْكموها ازّاي ..

حـ تِعْمِل إيه مَعَ جْرَانِي؟؟

ح تِطْعِمْهُم وتِنْساني؟؟

حـ تِسْقِيهم سولاري بحُور ..

وأرْجَعْ لِلطّابُور تَانِي؟

خَلاص .. خَلّصْت بِيعة الأرْض؟

قِبِلْت العَرْض؟

ما تِتّرَيَـقْش علَى عوّاد

حَيَالله هِىّ حِتّة أَرْض

ما فُوق الأَرْض ..

خَلّصْت السّنَن والفَرْض ..

وتَحْت الأَرْض ..

تِعدّي الخَلْـق رايح جاي!

تَعَاشّب شَاي
وقُوللّي حـ تُحْكُموها ازّاي

شِبِطتّ يا عَمّ فـ الثّوْرَة وفـ الصّنْدُوق

ولَوْ الثّوْرَة نِعْمِلْهَا

عَاوِز ثَوْرَة؟

حـ اجِيْب اتْنِيْن

وحـ انْزِل أَحْشِد المَلايِيْن

وأَمْلَى ياعَمّ فِـ المَيَادِين

وأَهْتِف ..

مَـ الهِتَاف جَاهِز بَقَالُه سنِين

ولَوْ قُلْت الكَلام بالذّوق

ما تِيجِى نبُصّ عـ الصّنْدُوق

دَه بَعْد النُّص بشْوَيّة

ده نُصّ الخَلْق مشْ طايْقاك .. وﻻ رايْداك

ساعِتْها .. لمّا كُنّا اصْحَاب

حـ تُحْكُمْنِى كِدَه عَافْيَة؟

دى شَبْكَة وﻻّ كَتْب كتَاب؟

خَلاص مَلّيتْ ..

طَلَبْت الخُلْع مِن حُكْمَك ..

ومَضّيت الحُشُود دى شهُود

ماعَدْش يجُوز ..

أَعِيش انا وانْتَ عِيشَة حَرَام ؟؟

ماعَدْش يجُوز ..

تِرَكّبْ عـ البَلَد "أَرَاجُوز"

هشام حسني

القاهرة

اكتوبر٢٠١٣