بالـدّور يا حَـضـرِت

- يا اخوانّا مايصحّش كده .. 

 مش بالـزّعيق  ولا بالـزّحام .. 

  من فضلكـم حبّة نظـام ..
  أول ما ييجي الدور عليك أنا ح انـدهك ..
  مالهـاش لـزوم الزحمـة دي؟!
  ايه اللى جـدّ؟ ..
= (ما تشوفـلي يابني فاضل لي كـام)
-  والله ما اعرف معـذرة ..
   الكّشـف مش عندى هنا ..
   أنا بس بانـده عَ الأسامي والسلام ..
   ماهو ده النظـام ..
   يا حاجّة!! عدّي اتفضلي ..
= (إلـهي يابني يجبُـرك ..
   أنا أصلي جايّة من بعيد ..
   وماعادش حاجة ارجعلها ..
   وماعادش حتى معايا حق التذكرة ..)
»  (( مبروك يا حاجّة ..
   عقبال ما ييجي اـلدّور علينا كلنا ..))
- يا اخوانّا قلنا مش كــده ..
  حبّة نظـام ..
» (( ماتشوف ياعمّ ..
   مفيش أسامي كمان معاك؟؟؟
   الدنيا مش مستحملة ..
   دوّر كمان .. آجي وخلاص؟؟
   في مشكـلة؟؟ ))
- تلاتـة بالله العظـيم ..
  ما ح ادخّلك إلا اما ييجي الدور عليك ..
  وسّـع شـويــة ..
  تعالى يابني من هنا ..
  قرّب كمـان ..
= (استأذنك ادخل معاه؟؟
    معلش دَه ابنـي ..
    عّيــل صغير ..
    واهو برضه لو عيط أشيله .. أونّسه ..
    أدخل معـاه ..
    سايقة عليك المصطفى ..
    خلّيني بس ادخل معاه ..)
- والله لو ينفع لكنت أدخّلك ..
  بس النظام ..
  ما تقلقـيش ..
  والله ف عنينا يا أمي اتطمني ..
  إستني بس شوية وادعي ..
  الوقت بيعدّي هــوا ..
  قادر يجمّـعكم سوا ..

 - يا أساتـذة حاسـبوا وسّــعوا ..
   من فضلكم .. الكلّ يرجعلـي ورا ..
   والله ما ح ينفــع كـده ..
   من فضلـكـم ..
   الكل يلـزم مطـرحـه ..
   مافيهـاش كـلام ..
   ماتــروّحــوا ..
   والله وح نبعَـت نجيبكـم مش هـزار ..
   والله ما ح يفرق معاكـو الإنتظـار ..
   اليوم طويــل ..

= والله ما ح تِـفـرق خـلاص ..
   اليوم طويل أو مش طويل ..
   إيـه العمـل ؟! ..
   ماعدش فيها خلاص أمل ..
   تعبنا من كُتر العيـاط ..
   ومن العــويـل ..
   سايقين علـيك المصطــفى ..
   خلّصنا منها يا عـزرائيــل ..

هشام حسني

مارس ٢٠١٩