اللّمُـــون

(١)

اتنين لَمُون ..

ترابيزة سِتّاشَر هناك تاِلت زِبون ..

فيه بنت حاجْتاشَر سَنة ..

خايفة تِلْمَحْها العُيون ..

وِوَاد حِلِيوَة..
شَكْلُه اوّل مرة يِعْزِم عـ اللّمون ..
وإيدين بتحْضُن بعضَها ..
تستحْلِف الزّمن اللّى جاى ..
يفضل حَنُون ..
وصُوت "مُنير" ..
بِيْغنّى للشّجر اللّى شاب ..
و فِـ القلوب .. لسّه يادوب ..
بِيِتْوِلِد زَهْرِ اللّمُون ..

*   *   *

(٢)

دَخَل المُواطِن يِنْتِخِب .. على كلّ لُون ..

طال الطّابور .. عدّت ساعات ..
معَلِش .. كلّه اليوم يِهُون ..
من النّهاردَه أنا حـ ابقى حرّ  ..
خلاص مفيش لِلْخَلْف دُر ..
مِسِك الَوَرَق ..
يا نْهار غرَق ..
مِ الفِلّ .. للْمِهْبِلّ .. للمِحْوِلّ ..
على كام حَيْزِبون ..
دَه ورق يِدَخّل برلمان؟
ده يدوب يدخل بَنْزايون ..
طَبْ يِعْمل ايه؟؟
علّم علامة منِ الزّهق ..
ودعى المُنجّي من الغرق ..
فِـ الشّقّ راح رامي الورق ..
غرّق صُباعه فـ الدّواية ..
وصوّره .. وشيّره
مسح جبينه من العرق ..
وفـ قهوة عند المُفترق
نفخ همومه فـ الهوا ..
بحجرين لَمون

*   *   *

(٣)

زغاريد كِتِيرة مجَلْجِلَة وأنوار نيُون ..
واتفضّلوا الشَرْبات .. 
تعالوا اتفضلوا هنا فِـ الصّالون..
وضِحْكة تِتْـنطّط على وشّ البنات تِجري..

تلعب شوية وتِستريّح فى العيون ..
وألف مبروك .. وعُقبال البكاري ..
وربّنا يتمّم بخير ..
وحِلْو فستانِك .. تجَنّن طرحتِك ..
وكلام كتير ..
وروّحوا المعازيم .. واستَأذِنِتْ ..
تدخل تريّح فِـ السّرير ..
دخَلِتْ اوضِتْها لوَحْدَها ..
بصّت على الفُستان ..
وحلّت كام ضِفِيرة فـ شَعْرها ..
وللأسَف ..
بصّت على الدبْلة فـ إيديها ..
وللأسَف ..
الإسم هوّ الإسم ..
والرّسم اختَلَف ..
(معقولة دي؟؟
ينفع نعيش نفس الحكاية ..
بِحَدّ تاني مُختَلِف؟؟
يِنفَع نِعيش فى الدنيا دى ..
علَشان تعذّبْنا الصُّدَف؟؟
زعْلانة منّك ..
زعْلانة منّك بالقَوِي ..
زعْلانة يا أوّل حِكايَة فـ دُنيتى ..
يِنفَع كده؟
كلّ الحاجات الحِلْوَة إللي عرِفْتَها .. 
تِطْلَع سَلَف؟!)
ومِـ الشّجون .. دِمْعِتْ عُيُون ..
وفـ كفّها .. حاوْلِتْ تِدارى وِشّها ..
وِوِشّها .. من حُزنَها ..
قدّ اللّمون ..

*   *   *
(٤)

هَبَطِتْ عَليك المُعجزة .. وبَقيتْ مَلِك ..
تٌؤْمرْ وتِنْهى وتِمْتِلِك ..

مَوْكِب مَلِك ..
قَعْدِة مَلِك ..
أَكْلِة مَلِك ..
والكلّ فِـ الخير مِشْتِرِك ..
بَسّ الملك ..
طِلِع بِيِمْشى بزَمْبَـلِك ..
عَمّ المَلِك ..
صَحْصَحْ وفُوق ..
الشّعب مِـ الأوهام هِلِك ..
رَدّ المَلِك؟؟
ردّ المَلِك ..
( جَرَى إيه يا مَصْر؟! ..
مَـ المنجه رِخْصِتْ .. قُلْتِ لِك؟ )
المَنْجَه رِخْصِت؟!!
يا خلْق هوه ..
يا شعب هوه ..
يا مصر ياما شَرَحْتِلِك ..
فى ورْد مات جوّه البَلَد دى عَشان نِعِيش ..
عشان نكُون ..
وناس ماجابْهاش عَـ الكّراسي .. غِيرِ اللّمُون

هشام حسني

القاهرة     

سبتمبر ٢٠١٣